Urukiko rurinda itegekonshinga mu Burundi rwemeje ko Evariste Ndayishimiye arahirira kuba umukuru w’igihugu cy’uBurundi nyuma y’urupfu rutunguranye rwa Perezida Pierre Nkurunziza wagombaga gusoza manda ye muri Kanama 2020. Abarundi n’inshuti zabo bari mu kiriyo nyuma y’uru rupfu rwabaye tariki 8 Kamena mu bitaro Hôpital du Cinquantenaire byo mu ntara ya Karusi.

Itangazo riva mu bunyamabanga bwa Perezida ryasohotse rivuga ko Perezida Nkurunziza yitabye Imana azize ihagarara ry’umutima. Iri tangazo ryasohotse Tariki 9 ryavugaga ko Nkurunziza yarebye imikino y’umupira w’intoki tariki 7 ameze neza.Nyuma yaje kuremba birangira atabarutse.

Abanyapoliticye benshi bari bakomeje kwibaza uzamusimbura mu gihe haburaga iminsi micye ngo arangize imyaka ye nkuko bitangazwa na Aljazeera. Urukiko rurengera itegekonshinga rwitabajwe, rwavuze ko nta mpamvu yo gutegereza inzibacyuho ko ahubwo Evariste Ndayishimiye watowe yahita arahira.
Tariki 18 Gicurasi, Amjambo Africa yatangaje inkuru ivuga ko mu gihe isi ihangayikishijwe na Virusi ya COVID-19, uBurundi bwo bwateguye amatora kandi abarundi banitabira inama z’amashyaka zihuriwemo n’abantu benshi kandi nta guhana intera cg se gupfuka umunwa. Perezida Nkurunziza kandi yakomeje kugaragara mu biterane bya gikirisitu avuga ko Iyi Virusi ica mu mwuka kandi ko Imana yawusukuye.

Ikinyamakuru The Guardian hamwe n’ibindi binyamakuru byatangaje ko Perezida Nkurunziza ashobora kuba yarazize indwara ya COVID-19. Umugore we Denise Nkurunziza, aheruka kujyanwa muri Kenya igitaraganya kuvurwa tariki 28 Gicurasi. Ikinyamakuru the Daily Nation cyatangaje ko mubyo yavurwaga harimo na COVID-19. Yahise agaruka mu Burundi umugabo amaze gutabaruka.

Umwe mu barundi batuye muri Concord New Hampshire atangaza ko bibaye ari ukuri ko Nkurunziza azize COVID-19, byaba ari isomo rikomeye ku bayobozi bacyerensa indwara ntibarinde abaturage babo indwara nk’izi. Akomeza avuga ko yatunguwe n’aya makuru kandi yari asanzwe avugana n’abavandimwe be baba i Burundi bamubwiye ko amakuru ya COVID-19 yakomeje gufatwa nk’ibanga ntatangazwe.
Nkurunziza ashobora kuba abaye umuperezida wa mbere uzize COVID-19 nkuko bitangazwa na the New York Post.